Daily Economic Digest [ სამშაბათი 07 სექტემბერი 2010 ] : Ministry of Economic Development of Georgia

დაიჯესტი (სამშაბათი 07 სექტემბერი 2010)

ინფრასტრუქტურა

UNDP-ის ხელშეწყობით პანკისის ხეობაში დატბორვის საფრთხე შემცირდება

გაეროს განვითარების პროგრამის (UNDP) დახმარებით, პანკისის ხეობაში, წყალდიდობისგან დამცავი სამუშაოები ჩატარდება. სამუშაოების ფარგლებში, ალაზნის არხისა და მთის ხევების კალაპოტების გაწმენდა და ნაპირების გამაგრება განხორციელდება.

გაეროს განვითარების პროგრამის (UNDP) ფინანსური და ტექნიკური დახმარებით, მიმდინარე წლის სექტემბრის ბოლომდე, ალაზნის არხისა და მთის ხევების 8 კმ-ზე მეტი სიგრძის მონაკვეთი გაიწმინდება. აღნიშნულ სამუშაოებზე, 30 ადგილობრივი მაცხოვრებელი დროებით დასაქმდება.

გაეროს განვითარების პროგრამის (UNDP) ახალი ინიციატივა 2010 წელს დაიწყო და პანკისის ხეობის სოციალური და ეკონომიკური განვითარების ხელშეწყობას ითვალისწინებს. გაეროს ლტოლვილთა უმაღლეს კომისარიატთან (UNHCR) თანამშრომლობით, UNDP სამუშაოების გაფართოებასაც გეგმავს. პროექტის მიმართულებებს შორისაა ადგილობრივი მმართველობის განვითარება, სოფლის მეურნეობის ხელშეწყობა, პროფესიული განათლება და ინფრასტრუქტურის რეაბილიტაცია.

ინფრასტრუქტურა

„საქართველოს რკინიგზა“

მიმდინარე წლის ივლისი-აგვისტოს განმავლობაში, „საქართველოს რკინიგზიაში“ მგზავრთა გადაყვანის მაჩვენებელმა 600 000-ს გადააჭარბა. „საქართველოს რკინიგზა“ საკურორტო სეზონისთვის სრული დატვირთვით მუშაობას განაგრძობს. „საქართველოს რკინიგზის“
ინფორმაციით, მიმდინარე წელს, რკინიგზით მგზავრთა გადაყვანის რაოდენობის მაჩვენებელმა საუკეთესო შედეგს მიაღწია.

ივლისი-აგვისტოს თვეში გადაყვანილია 680 000 მგზავრი. სამგზავრო გადაყვანებიდან შემოსულმა თანხამ კი 4,7 მლნ. ლარი შეადგინა, რაც საუკეთესო მაჩვენებელია ბოლო ათწლეულების ანალოგიურ მონაცემებთან შედარებით.

აღსანიშნავია, რომ „საქართველოს რკინიგზის“ მომხმარებელთა შორის, მკვეთრად იმატა მგზავრების რაოდენობამ სომხეთის რესპუბლიკიდან. მხოლოდ ივლისი-აგვისტოს თვეში, ერევანი-მახინჯაური-ერევნის მიმართულებით გადაყვანილია 34 000 მგზავრი, რაც ორჯერ და მეტად აღემატება გასული წლის მონაცემებს. შარშან, მთელი სეზონის განმავლობაში, „საქართველოს რკინიგზამ“ 16 000 სომეხი ტურისტი გადაიყვანა

ლიცენზიების სფერო

ბუნებრივი რესურსები

2010 წლის 6 სექტემბერს, საქართველოს ეკონომიკისა და მდგრადი განვითარების სამინისტროში სასარგებლო წიაღისეულის მოპოვების ლიცენზიის გაცემის მიზნით გამართული აუქციონის შედეგად შემოსულმა თანხამ 329 638 ლარი შეადგინა.

აუქციონზე 1 ობიექტის - გრძელვადიანი ტყითსარგებლობისათვის ხე-ტყის დამზადების სპეციალური ლიცენზია გაიყიდა.

გაყიდული ობიექტია:

იმერეთის რეგიონში, ვანის სატყეო უბანზე, ყუმურის ყოფილი სატყეო, წიფელი და თხმელას ჯიშები (329 638 ლარი). ლიცენზიის მოქმედების ვადა 10 წლით განისაზღვრება.

საქართველოს ეკონომიკისა და მდგრადი განვითარების სამინისტროში, 2010 წლის პირველ 6 თვეში, სასარგებლო წიაღისეულის მოპოვების ლიცენზიის გაცემის მიზნით გამართული აუქციონების შედეგად შემოსული თანხა 4,5 მლნ. ლარს შეადგენს.

ბიზნეს სექტორი

საქართველოში დარეგისტრირებული და ევროკავშირის ქვეყნებში დაცული ქართული ღვინოები

ინტელექტუალური საკუთრების ეროვნულმა ცენტრმა „საქპატენტმა“ სპეციალური ბიულეტენი გამოსცა, რომელიც მოიცავს ინფორმაციას საქართველოში დარეგისტრირებული და ევროკავშირის ქვეყნებში დაცული ქართული ღვინოების შესახებ.

ქართული ღვინის 18 ადგილწარმოშობის დასახელების რეგისტრაცია „საქპატენტში“, ეტაპობრივად, მას შემდეგ განხორციელდა, რაც ძალაში შევიდა შესაბამისი კანონმდებლობა („საქონლის ადგილწარმოშობის დასახელებისა და გეოგრაფიული აღნიშვნების შესახებ“ კანონით გათვალისწინებული ღვინის ადგილწარმოშობის დასახელების დაცვასთან დაკავშირებული ნორმატიული აქტები).

ღვინოების რეგისტრაცია ხელს შეუწყობს ჯანსაღ კონკურენციას და ამ დასახელებების ღვინოების ფალსიფიცირების ფაქტების აღკვეთას.

ინგლისურ ენაზე გამოცემულ „სამრეწველო საკუთრების ოფიციალური ბიულეტენის“ სპეციალურ გამოშვებაში – „APPELLATIONS OF ORIGIN OF GEORGIAN WINE“ – შესულია რეგისტრირებული ქართული ღვინოების ადგილწარმოშობის ზონების დახასიათება, გეოგრაფიული მდებარეობა, კლიმატი, ნიადაგის დახასიათება, აგრო-ტექნიკური რეგლამენტები, ჯიშის სამეურნეო-ტექნოლოგიური დახასიათება და მეცნიერულად დასაბუთებული სხვა მონაცემები.

ბიულეტენი ევროკავშირის ქვეყნებში საქართველოს ყველა საელჩოში დაიგზავნება. მისი გამოცემის ერთ-ერთი დანიშნულება მოსახლეობის ინფორმირების გარდა ისიც არის, რომ ევროკავშირის ქვეყნებში ქართული ღვინის გაყალბების ნებისმიერი ფაქტის დაფიქსირების შემთხვევაში შესაბამისი რეაგირება მოხდეს.

„საქპატენტის“ მიერ გამოცემული ბიულეტენს ინტელექტუალური საკუთრების დაცვის უცხოელი ექსპერტები პირველად, მიმდინარე წლის 6-10 სექტემბერს, იალტაში დაგეგმილ საერთაშორისო კონფერენციაზე გაეცნობიან. უახლოეს მომავალში, ბიულეტენი ქართულ ენაზეც გამოიცემა.